Tur ser humano mester drumi. Si nos no drumi sufisientemente nos no por funshoná manera mester. Kuantu soño bo tin mester ta dependé di bo estado di salú, bo kustumber di trabou, bo edat i bo metabolismo. Mayoria (di) hende tin mester di mas o ménos ocho ora di soño pa anochi (algun estudio ta pone e márgen entre shete pa nuebe ora).
Aki ta sigui algun sugerensia simpel ku por yuda mayoria di nos pa drumi i haña e deskanso ku nos mester. Si bo tin problema serio ku drumimentu, tuma kontakto ku bo dòkter di kas.
1. Tuma bo soño na serio. Komprondé ku ta nesesario pa drumi sufisientemente tur anochi.
2. Desaroyá un patronchi di drumi regular. Nos kurpa ta traha ku ritmo, pues purba di bai drumi na e mesun ora tur anochi i lanta na e mesun ora. Asta den fin di siman.
3. Hasi ehersisio físiko regularmente. Ehersisio por ta mashá benefisioso pa yuda bo drumi bon anochi. Ora bo ta hasi ehersisio bo kurpa ta usa energia i drumimentu (huntu ku kome kuminda apropiá) ta e mihó manera pa restorá esei.
4. No bai drumi ku stoma yen. Desaroyá e rutina di kome algu leve anochi i evitá di kome por lo ménos dos ora promé ku bai drumi.
5. Evitá di bebe kos ku kafeina, ya komo kafeina ta un stimulante i e por tene bo lantá.
6. Evitá situashon di tenshon promé ku bo bai drumi.
7. No pone televishon den bo kamber i semper paga bo WiFi promé ku bo bai drumi.